លទ្ធផលនៃការសិក្សាស្រាវជ្រាវថ្មីរបស់ក្រុមអ្នកវិទ្យាសាស្ត្រប្រទេសអូស្ត្រាលីបានបង្ហាញថា ការទទួលទានដំឡូងបារាំងក៏ដូចជា បណ្តាអាហារសម្បូរម្សៅដទៃទៀតជាមួយសាច់ក្រហម អាចជួយកាត់បន្ថយហានិភ័យកើតមហារីកពោះវៀនធំដែលបង្កឡើងដោយសាច់ប្រភេទនេះ ។ ការសិក្សាដែលធ្វើឡើងដោយអ្នកវិទ្យាសាស្ត្រមកពីសាកលវិទ្យាល័យ Flinders University នៅក្រុង Adelaide ប្រទេសអូស្ត្រាលីបានអះអាងថា សារធាតុម្សៅដែលមាននៅក្នុងបណ្តាបន្លែមើម គ្រាប់ធញ្ញជាតិនិងពពួកសណ្តែកធ្វើនំ/បង្អែម គឺមានលទ្ធភាពអាចពង្វាងនូវប្រសិទ្ធភាពបំផ្លាញរបស់សាច់ក្រហមទៅលើវត្ថុធាតុពន្ធុក្នុងបណ្តាកោសិកាមានឈ្មោះថា មីក្រូ RNA ។
Karen Humphreysសមាជិកក្រុមស្រាវជ្រាវបានថ្លែងថា៖ «សាច់ក្រហមនិងសារធាតុម្សៅដែលជាប់ស្អិត មានប្រសិទ្ធភាពផ្ទុយគ្នាទៅលើមីក្រូRNAsដែលជាអ្នកជំរុញឱ្យកើតមានមហារីក ។ ការរកឃើញលើកនេះបានជួយគាំទ្រឱ្យមានការប្រើប្រាស់បន្ថែមទៀតនូវជាតិម្សៅស្អិត ក្នុងន័យកាត់បន្ថយហានិភ័យដែលពាក់ព័ន្ធនឹងរបបអាហារសម្បូរដោយសាច់ក្រហម » ។
ការពិសោធលើអ្នកស្ម័គ្រចិត្ត២៣នាក់ ប្រើពេល៤សប្តាហ៍រកឃើញថា ការទទួលទានរបបអាហារសម្បូរដោយសាច់ក្រហម បានផ្លាស់ប្តូរកម្រិត មីក្រូ RNAs នៅក្នុងជាលិកាពោះវៀនត្រង់ ។ និយាយឱ្យចំទៅ អ្នកវិទ្យាសាស្ត្របានរកឃើញកំណើនមួយក្នុងមីក្រូ RNAs ដែលជាប់ពាក់ព័ន្ធនឹងមហារីកពោះវៀនធំ ។
មហារីពោះវៀនធំចាប់ផ្តើមអភិវឌ្ឍខ្លួននៅក្នុងទ្រនាប់ខាងក្នុងកោសិកាពោះវៀនធំនិងពោះវៀនត្រង់ ។ ការប្រើប្រាស់គ្រឿងស្រវឹងច្រើន ការជក់បារី ការមិនហាត់ប្រាណនិងការទទួលទានសាច់ក្រហមច្រើនគឺសុទ្ធតែជាកត្តាសំខាន់បណ្តាលឱ្យកើតមហារីកពោះវៀនធំ ។
សាស្ត្រាចារ្យ Humphreysបានកត់សម្គាល់ថា៖ «អាហារគំរូដែលជាប្រភពម្ស៉ៅស្អិតធម្មជាតិមានដូចជា ផ្លែចេកចាស់ (មិនទាន់ទុំ) ដំឡូងបារាំងចម្អិន គ្រាប់ធញ្ញជាតិមិនទាន់កែច្នៃ បណ្តាគ្រាប់សណ្តែកធ្វើបង្អែមឬនំ...។ ចំណែកផ្លែពោតដែលជាជឿថាជាប្រភពម្សៅស្អិតយ៉ាងច្រើនក្រាស់ក្រៃផងដែរនោះត្រូវបានអ្នកវិទ្យាសាស្ត្រកំពុងសិក្សាយ៉ាងយកចិត្តទុកដាក់»៕
No comments:
Post a Comment