គំនិតមួយក្នុងចំណោមគំនិតដ៏ងាយបំផុតនោះ គឺទទួលទានទឹកឱ្យបានច្រើន ។ វាជាវិធីសាស្ត្រយ៉ាងងាយស្រួល និងចាយលុយអស់តិចបំផុតក្នុងការរក្សារាងមិនឱ្យធាត់ហើយនៅក្មេងបានយូរ ។ ប្រសិនជាគេអាចប្រើប្រាស់ទឹកក្នុងបរិមាណគ្រប់គ្រាន់ពេញមួយថ្ងៃនោះស្បែកនឹងស្រស់ថ្លាតឹងណែន ។ មួយវិញទៀត វាក៏នឹងជួយរក្សាមិនឱ្យរាងកាយខ្វះជាតិទឹក ទប់ស្កាត់បានភាពជ្រីវជ្រួញ ។
ការទទួលទានអាហារប្រកបដោយអនាម័យ ដែលផ្តល់អត្ថប្រយោជន៍ចំពោះសុខភាព ឬទទួលទានរបបអាហារដែលមានតុល្យភាព គឺមិនទាន់គ្រប់គ្រាន់ដើម្បីរក្សាបាននូវយុវវ័យភាពនោះទេ ។ ផងដែរ គេចាំបាច់ត្រូវធ្វើឱ្យរាងកាយមានសកម្មភាពជាប្រចាំតាមរយៈការហាត់ប្រាណមានដូចជា ដើរ រត់ រាំតាមចង្វាក់ភ្លេងឬលេងកីឡាផ្សេងៗ ។
ការជក់បារីគឺជាទម្លាប់មួយក្នុងចំណោមទម្លាប់អាក្រក់ជាច្រើនដែលបង្កើនល្បឿនភាពចាស់ទៅតាមអាយុរបស់រាងកាយ ។ ដូច្នេះ ប្រសិនជាគេចង់រក្សាភាពវ័យក្មេង និងរស់នៅឱ្យបានយូរអង្វែងគួរនៅឱ្យឆ្ងាយពីបារី ។
ជាធម្មតា ផ្ទៃមុខនិងបរិវេណកគឺជាផ្នែកនៅលើរាងកាយដែលឆាប់ចាស់ជាងគេបំផុត ។ គេគួរថែរក្សាយ៉ាងពិសេសបរិវេណទាំងពីរនេះ ។ ការលុបលាងមុខ២ដងក្នុងមួយថ្ងៃ គឺជាជម្រើសដែលគួរអនុវត្ត ។
ចំណែកខួរក្បាលក៏ជាផ្នែកដែលងាយចាស់ទៅតាមវ័យផងដែរ ។ ដើម្បីរក្សាឱ្យមានភាពវៃឆ្លាត គេចាំបាច់ត្រូវរក្សាខួរក្បាលឱ្យមានសកម្មភាពជាប្រចាំតាមរយៈការអានសៀវភៅជាដើម ។ បន្ថែមពីលើនេះ ការរៀនភាសាបរទេសណាមួយក៏អាចជួយឱ្យខួរក្បាលរហ័សរហួនដូចវ័យក្មេងផងដែរ ៕
No comments:
Post a Comment