ដេវីត មិនបតតសុំតែសុខទោះបីជាត្រូវអាចារ្យធំរិះគន់យ៉ាងណាក៏ដោយ

នាពេលថ្មីៗនេះ មានការ Live នូវវីដេអូមានរយៈពេលជាងមួយម៉ោងរបស់បុរសជាអ្នកអភិរក្សសិល្បៈខ្មែរម្នាក់ មានសក់វែង ចងកំប៉ោយដូចជាមនុស្សស្រី ប្រាប់នាមខ្លួនថា លោកអាចារ្យធំ ដោយបានបង្ហោះនូវវីដេអូឃ្លីបមួយបញ្ចេញទស្សនៈរិះគន់យ៉ាងខ្លាំងចំៗទៅលើតារាចម្រៀងប្រុស ដែលកំពុងតែពេញនិយម និងស្រូបបានការគាំទ្រពីសំណាក់ប្រិយមិត្តក្រុមយុវវ័យខ្លាំង នៅលើទ្រនំហង្សមាស លោក ងួន ចាន់ដេវីត ឬហៅ G-Devith នោះថា គឺជាអ្នកពង្វក់កូនខ្មែរជំនាន់ក្រោយ ធ្វើឲ្យខូចវប្បធម៌ និងប្រើពាក្យពេចន៍តិះដៀលអសុរោះសង្កត់ធ្ងន់ៗចំពោះអ្នកសិល្បៈបែកស្លុយដទៃទៀតយ៉ាងដំណំផងដែរ។

ទោះជាបានដឹង និងស្តាប់ឮពាក្យត្មះតិះដៀល ពីសំណាក់បុរសអាចារ្យធំ ដែលបានអះអាងថា គឺជាអ្នកការពារវប្បធម៌ខ្មែរពីបុរាណមានក្រុមផ្ទាល់ខ្លួនថា «យុវជននគររាជ» បានវាយប្រហារពាក្យសម្តីធ្ងន់ៗ មកលើខ្លួនយ៉ាងណាក្តី ក៏លោក ងួន ចាន់ដេវីត មិនប្រតិកម្មតបតវិញដែរ។

ខណៈតារាចម្រៀងដែលចេះនិពន្ធទំនុកច្រៀងនិងទំនុកភ្លេង ម្ចាស់បទល្បីខ្លាំងមុនដំបូង មានចំណងជើងថា «រាំញីកែងជើង» គ្រាន់តែបាននិយាយថា៖ «ខ្ញុំសុំមិនធ្វើការបរិយាយនូវរឿងអ្វីនោះទេចំពោះរឿងកើតឡើងមកនេះ ដោយគ្រាន់តែទុកឲ្យបងប្អូនជាមហាជនជួយពិចារណាតាមដាន ឬធ្វើការតតាំងជាមួយគាត់ [អាចារ្យធំ] ទៅចុះ! គឺរូបខ្ញុំសុំតែសុខតែប៉ុណ្ណោះបានហើយ»។

បើតាមខ្សែវីដេអូឃ្លីបរបស់អាចារ្យធំ ដែលបានរិះគន់មកលើតារាចម្រៀងលោក ងួន ចាន់ដេវីត និងក្រុមតារាចម្រៀងសម័យក្រោយៗដទៃទៀតដែលនិយមតែទម្រង់សិល្បៈបែកស្លុយថាជា «ទំពាំងស្អុយ» ព្រោះតែលោកមានកំហឹងឈឺចាប់យ៉ាងខ្លាំង ខណៈមានដំណឹងថា ប្រទេសថៃកំពុងទាមទារដាក់ទម្រង់សិល្បៈល្ខោនខោល ទៅកាន់អង្គការយូណេស្កូ ថាជាកេរមរតកសិល្បៈរបស់គេ និងបានដៀលឲ្យតារាប្រុសរូបនេះដែរថា៖ «ក្នុងនាមអ្នកសិល្បៈខ្មែរមួយរូប គ្រាន់តែឈ្មោះខ្លួនឯង មិនមានអ្វីជាអត្តសញ្ញាណខ្មែរបែរដាក់ថា G-Devith យកតាមតារាកូរ៉េ G Dragon ដែលមានរូបសាក់លើខ្លួន គ្មាន អត្តសញ្ញាណខ្មែរឡើយ»។

លោកក៏លើកឡើងដែរថា បើជ្រុលសាក់រូប គួរតែសាក់រូបជាទម្រង់សិល្បៈល្ខោនខោល ឬរូបយ័ន្តខ្មែរ និងផែនទីប្រទេសខ្មែរដូចជាលោកបានបង្ហាញតាមវីដេអូនោះទើបល្អប្រសើរមានប្រយោជន៍ដល់ជាតិខ្លួន។

ទោះបីលោក ងួន ចាន់ដេវីត មិនតបសារអ្វីទៅកាន់លោកអាចារ្យធំ ដែលបានអះអាងថា រូបលោកគឺជាអ្នកអភិរក្ស និងអ្នកតស៊ូការពារទម្រង់សិល្បៈបុរាណខ្មែរមិនឲ្យបាត់បង់ទៅតាមក្រុមអ្នកសិល្បៈបែកស្លុយខូចទម្រង់សិល្បៈខ្មែរ តាមរយៈការ Live វីដេអូ ជាងមួយម៉ោង នៅក្នុងបន្ទប់សណ្ឋាគារមួយដោះអាវបង្ហាញរូបសាក់នានាសឹងតែពេញខ្លួននោះក្តី គេក៏ឃើញមានអ្នកគាំទ្ររបស់តារារូបនេះ បានចេញសារតបជំនួសជាច្រើនដែរមានភ្ជាប់ជាមួយនឹងរូបថតសកម្មភាពសប្បុរសធម៌នានាទៀតផង។

សារនោះថា៖ «អំពើល្អគេមើលមិនឃើញទេ តែបើមានកំហុសបន្តិចគឺចេញមករិះគន់ជាន់ពន្លិចគេតែម្តង។ អាចារ្យធំបើគាត់ជាមនុស្សល្អពិត មិនមែនមកវាយប្រហារគេតែម្នាក់អ៊ីចឹងទេ។ បទចម្រៀងបែកស្លុយគឺពេញប្រទេសហេតុអីមករិះគន់តែ ដេវីត ម្នាក់? និយាយហាមាត់ឡើងគឺជេរ ម៉ែឪគេ ដៀលពូជគេ ពាក្យអញ អា ហែ្អង មី ង៉ែង គ្មានសីលធម៌»៕